Vi bidrar til at digital inkludering aukar verdiskaping

Uu-tilsynet vil samarbeide med teknologimiljø og bidra til at næringslivet kan utvikle innovative og universelt utforma løysingar. Tilsynet vil styrke rettleiinga om korleis verksemdene kan sikre universell utforming i innkjøp og utvikling. Dette kan bidra til høgare bevisstheit blant verksemdene om at digital inkludering inneber auka kundemasse, betre omdømme, ei meir saumlaus kundereise, høgare effektivitet og lågare oppfølgingskostnader.

Uu-tilsynet ynskjer å etablere ei regulatorisk sandkasse – i første omgang for digitale løysingar i utdanning. Sandkassa gir rom for eksperimentering utan risiko for sanksjonar i utviklingsfasen. Dette vil stimulere til innovasjon, gi innsikt i utfordringane i marknaden og bidra til meir smidig regelverkspraksis.

Så langt det er mogleg – teknisk, juridisk og økonomisk – vil vi jobbe for at verksemdene får dei ressursane dei treng for å lykkast med inkludering. Det skal bli enklare for marknaden å ta i bruk tilsynet si testmetodikk, og vi vil legge til rette for bruk av våre metodar og data til innovasjon, mellom anna gjennom API-løysingar for testverktøy.

Gjennom desse tiltaka skal vi styrke samspelet mellom regulering og innovasjon, og gjere det lettare for verksemder å utvikle inkluderande og konkurransedyktige digitale løysingar.