Korleis lage tilgjengelegheitserklæring?

Det å lage ei tilgjengelegheitserklæring handlar om fleire ting. Det viktigaste er at verksemda har kontroll på krava og har ein plan for korleis ein skal jobbe med universell utforming i løysingane.

På denne sida

    Seks steg fram til ferdig erklæring

    Kven som gjer sjølve jobben med testing og utfylling vil variere. Det kan vere innleigde konsulentar, nettredaktør, kommunikasjonsmedarbeidar, ikt-medarbeidar eller uu-teamet. Vi har oppsummert dei seks stega for å få på plass ei tilgjengelegheitserklæring.

    1 Kjennskap om krava til universell utforming

    Er universell utforming av nettstader nytt for verksemda? Då må verksemda sette seg inn i krava først. Dette er den viktigaste jobben og som tek mest tid.

    Bruk gjerne rettleiinga vår for å få oversikt over innhaldet i krava og kva dei betyr. Kjennskap til krava er ein føresetnad for å kunne opprette tilgjengelegheitserklæringa.

    Nyttig informasjon og rettleiing:

    2 Test nettstaden

    Før verksemda kan fylle ut tilgjengelegheitserklæringa treng ein oppdatert informasjon om universell utforming. Det betyr at ein først må teste og vurdere nettstaden opp mot krava i regelverket.

    Test av nettstaden kan gjerast internt eller med ekstern hjelp, eventuelt ein kombinasjon av begge deler. Eksterne kan vere leverandør eller konsulent.

    NB! Det er ikkje krav om tilgjengelegheitserklæring for appar innan 1. februar 2023.

    Omfanget av testinga

    Nettstaden skal testast og vurderast mot alle dei 49 minstekrava i regelverket.

    Verksemda skal svare på eit fast sett med spørsmål for kvart krav.

    Det er verksemda som avgjer omfanget av testen, for eksempel kva prosessar som skal inngå, kva og kor mange enkeltsider som skal testast. Regelverket har ikkje føringar for dette. Testinga skal sette verksemda i stand til å ta stilling til om krava er oppfylt eller ikkje.

    Verksemda bør teste

    • ulike sidetypar (malar), inkludert startsida
    • ulike innhaldstypar, for eksempel bilde og grafikk, tabellar, skjema, overskrifter, lyd og video, dokument, lenker, innhald som blinkar eller bevegar seg
    • koding, navigasjon, tastaturnavigasjon, styring av lyd, kontrast, språk, bruk av farge
    • viktig funksjonalitet, for eksempel sider som er ofte brukt

    Tidsbruk

    Første gong verksemda skal få opp resultat for alle krav, er det ein omfattande jobb. Kor stor jobben er vert påverka av kompetanse og kor god oversikt ein har frå før.

    Det er viktig å sette av tid og ressursar til arbeidet. Vi kan ikkje estimere tidsbruk, for det vil variere frå verksemd til verksemd.

    Testing skjer på ulike måtar, og den som testar kan bruke støtteverktøy. Med dagens teknologi er det berre delar av krava som let seg teste automatisk, og det er nødvendig å kombinere med semiautomatisk eller manuell testing.

    Informasjon og tips om testing

    Tilsynet utfører ikkje testing for verksemda i samband med tilgjengelegheitserklæring. Verksemda må sørge for nødvendig testing.

    I marknaden er det mange som tilbyr både testing av universell utforming, opplæring og kurs. Tilsynet kan ikkje tilrå bestemte verksemder til eit slikt oppdrag.

    3 Tilgang og innlogging for tilgjengelegheitserklæring

    Løysinga uustatus.no er enda ikkje open for pålogging.

    Offentlege verksemder vil få påloggingsinformasjon med PIN-kode i løpet av siste kvartal av 2022. Private verksemder skal ikkje ha tilgjengelegheitserklæring, og har derfor ikkje tilgang til løysinga.

    Informasjon om innlogging blir send til leiar av verksemdene i offentleg sektor, anten via eFormidling eller på e-post.

    Innlogging skjer i to trinn:

    • Du blir sendt til ID-porten, og identifiserer deg først med eigen eID, for eksempel BankID.
    • Deretter loggar du deg inn med verksemda sitt organisasjonsnummer og PIN-kode som verksemda får tilsendt.

    Tilgang til løysinga

    Alle får ikkje tilgang til løysinga samtidig. Løysinga vert rulla ut til verksemder i offentleg sektor etter en utrullingsplan. Verksemda kan ikkje logga inn i løysinga før ein har motteke informasjon frå Digdir.

    Verksemder i offentleg sektor som ikkje har fått tilgang

    Ei verksemd som meiner ein er offentleg sektor, og har minst ein nettstad som er omfatta av regelverket, men likevel ikkje har fått informasjon, kontaktar Digdir på e-post post@uutilsynet.no.

    Dersom verksemda meiner dei ikkje er del av offentleg sektor

    Det er berre verksemder i offentleg sektor som skal ha tilgjengelegheitserklæring. Dersom ei privat verksemd får varsel, er det viktig at verksemda gir beskjed til tilsynet ved å sende ei klage. Deretter gjer tilsynet ei ny vurdering av om verksemda inngår i offentleg eller privat sektor.

    4 Fyll ut skjemaet for tilgjengelegheitserklæring

    Skjemaet har ikkje responsivt design. Vi anbefaler at den som fyller ut skjemaet bruker desktop. Det er mindre eigna å fylle ut på mindre skjermar som nettbrett eller mobil.

    Tidsbruk

    Tidsbruk er avhengig av kor grundige førebuingar verksemda har gjort, kjennskap til krava og om det er mange brot på regelverket som krev grunngjeving.

    Vi kan ikkje estimere eksakt, men reknar med at det tek det inntil to dagsverk å fylle ut informasjonen i skjemaet, når det vert gjort første gong. Føresetnaden er at ein har testa og vurdert i nettstaden i forkant.

    Å endre på ei ferdig tilgjengelegheitserklæring går vesentleg raskare. Etter at du som verksemd har oppretta erklæringa for første gong, skal du oppdatere minst ein gong i året.

    Informasjonen blir synleg i ferdig erklæring

    All informasjon verksemda fyller ut i skjemaet vert synleg i den ferdige tilgjengelegheitserklæringa ein publiserer. Derfor er det viktig å gi rette opplysningar og å vere bevisst på korleis ein svarer på spørsmåla.

    Automatisk lagring

    Informasjonen i skjemaet vert lagra automatisk når du trykker på neste.

    Tilgjengelegheitserklæringa er eit utkast fram til du har stadfesta informasjonen og produsert den.

    Stega i utfyllinga av tilgjengelegheitserklæringa

    Følgjande steg er med i tilgjengelegheitserklæringa:

    Å velje type ikt-løysing

    Det første verksemda gjer er å velje kva type ikt-løysing ein lagar erklæring for. Det vil seie om ein skal opprette tilgjengelegheitserklæring for anten ein nettstad eller ein app (det er ikkje krav om tilgjengelegheitserklæring for app innan 1. februar 2023) .

    A. Om løysinga

    Steg A gjeld overordna informasjon om nettstaden eller appen og grunnlaget for testing.

    B. Vurdering av løysinga

    I steg B fyller verksemda ut resultat frå testinga, grunngir brot på kravet og viser til eventuelle tilgjengelege alternativ.

    Spørsmålsoppsettet og eksempel er likt for alle krav. Vi tilrår at verksemda gjør testinga først, før ein går vidare til steg B. Det er uansett mogleg å lagre eit utkast som ein fullfører seinare.

    C. Om tilbakemeldingsfunksjonen

    I steg C oppgir verksemda korleis brukaren kan kontakte dei for å gi tilbakemelding om universell utforming (tilbakemeldingsfunksjon). Det kan vere på e-post, digitalt skjema eller telefon.

    D. Arbeid med uu av ikt

    I steg D kan verksemda gi informasjon om arbeid med universell utforming av ikt. Dette steget er frivillig.

    E. Oppsummering

    I steg E får verksemda ei oppsummering av informasjonen som er fylt ut i skjemaet og høve til å kvalitetssikre opplysningar, gjere endringar og rette opp eventuelle manglar. I dette steget stadfestar verksemda at informasjonen i skjemaet er riktig.

    F. Produser tilgjengelegheitserklæring

    I steg F blir ferdig tilgjengelegheitserklæring produsert. Det blir generert ein URL. Det er denne URL‘en verksemda publiserer på nettstaden.

    5 Publiser tilgjengelegheitserklæringa

    Etter at verksemda har produsert tilgjengelegheitserklæringa, vert det oppretta ei lenke. Verksemda skal deretter publisere lenka på nettstaden. Tilgjengelegheitserklæringa skal vere enkel for sluttbrukaren å finne.

    Følgande skal til for at tilgjengelegheitserklæringa er publisert:

    • Lenka skal ligge på framsida på nettstaden den gjeld for, helst i botnteksten.
    • Lenketeksten skal vere Tilgjengelegheitserklæring (nynorsk) eller Tilgjengelighetserklæring (bokmål).
    • Lenka fører til tilgjengelegheitserklæringa som er produsert via løysinga til Digdir for den aktuelle nettstaden.

    Framsida er inngangssida som brukaren kjem til når ein besøker nettstaden utan å oppgi ei bestemt nettadresse. Det er og kalla forside, heimeside eller startside.

    6 Oppdater tilgjengelegheitserklæringa

    Verksemda kan når som helst logge inn og endre informasjon i tilgjengelegheitserklæringa.

    Ein skal oppdatere tilgjengelegheitserklæringa minst éin gong i året, og etter større endringar på nettstaden.

    Kva som er større endringar vil variere, men det omfattar for eksempel skifte av publiseringsløysing, større endringar av struktur eller visuell presentasjon, kjeldekode eller funksjonalitet som er felles for heile nettstaden.

    Tilsvarande gjeld dersom innhaldet på nettstaden går frå å bryte krava til å vere i samsvar med krava eller omvendt. Eit eksempel er at mange videoopptak går frå å vere utan teksting, til å ha teksting.

    Kva skjer om tilgjengelegheitserklæringa manglar?

    Dersom verksemda ikkje publiserer og årleg oppdaterer tilgjengelegheitserklæringa for sine nettstader, tek tilsynet i bruk reaksjonar. Dette kan vere pålegg om retting og dagbøter.

    Verksemder utan publisert og oppdatert tilgjengelegheitserklæring har i tillegg vesentleg større sjanse for å bli utvalt til kontrollar og tilsyn.

    Slik endrar eller slettar verksemda ei tilgjengelegheitserklæring

    Verksemda kan når som helst logge inn og endre informasjon i tilgjengelegheitserklæringa. Det er også mogleg å slette tilgjengelegheitserklæringa. Prosessen for endring eller sletting er påverka av om verksemda endrar på eit utkast eller ei produsert erklæring.

    Kvar unike nettstad kan ha inntil 2 tilgjengelegheitserklæringar på same tid.

    • Ei tilgjengelegheitserklæring som har status utkast.
    • Ei tilgjengelegheitserklæring som har status produsert.

    Endring av utkast til erklæring

    Når verksemda har valt om dei skal lage ei tilgjengelegheitserklæring for ein nettstad, blir det oppretta eit utkast til erklæring. Vi reknar med at verksemda ikkje nødvendigvis fyller ut skjemaet for tilgjengelegheitserklæring i ei arbeidsøkt, men jobbar med eit utkast i fleire omgangar.

    Neste gong verksemda loggar inn hentar ein opp det påbegynte utkastet i løysinga, og jobbar vidare med det utkastet.

    Verksemda finn utkastet til erklæring i oversikta i menypunktet Utkast.

    Sletting av utkast til erklæring

    Det er mogleg å slette eit påbegynt utkast til erklæring. Verksemda finn utkastet til erklæring i oversikta i menypunktet Utkast.

    Finn utkastet til erklæring som du skal slette, vel deretter Slett utkast og trykk Stadfest.

    Utkastet er no sletta.

    Endring av ei produsert erklæring

    Verksemda finn produsert erklæring i oversikta i menypunktet Produserte erklæringar.

    Når verksemda skal endre ei produsert erklæring, blir det tatt ein kopi av den produserte erklæringa, som får status som utkast. Dette utkastet gjer ein nødvendige endringar i.

    Den erklæringa som er produsert og publisert på nettstaden til verksemda vert ikkje endra så lenge ein jobbar med oppdatert erklæring som utkast. Endringane blir først synlege i den publiserte erklæringa på nettstaden, etter at verksemda har stadfesta oppdateringa i det siste steget i løysinga, steg F Produser tilgjengelegheitserklæring.

    Stadfest at opplysningane er korrekte. Oppdateringa går deretter live, utan at verksemda treng å endre lenka på nettstaden.

    Sletting av ei produsert erklæring

    Det går an å slette ei produsert erklæring. Verksemda finn oversikt over produserte erklæringar i menypunktet Produserte erklæringar.

    Finn produsert erklæring som du skal slette, vel Slett erklæring i kontekstmenyen (pila ved sidan av Vis detaljar). Stadfest at du skal slette erklæringa

    Produsert erklæring er no sletta.

    Kopi av produsert erklæring

    Viss verksemda har fleire nettstader som bygger på same rammeverk, kan det vera nyttig å ta kopi av ei tilgjengelegheitserklæring frå ein annan nettstad.

    Verksemda kan gjenbruke delar av informasjonen, til å fylle ut ei tilgjengelegheitserklæring for ein nettstad som ikkje har det frå før.

    Når verksemda brukar kopifunksjonen vil ein starte utfyllinga på Steg A Om nettstaden, der ein må oppgi nettstadens namn og nettadresse. Desse skjemafelta vil alltid vere tomme, slik at verksemda ikkje kan opprette ei duplisert erklæring for ein nettstad som allereie har eit utkast eller ei produsert tilgjengelegheitserklæring

    Gjenbruk av informasjon er særleg aktuelt for Steg B i erklæringa "Vurdering av løysinga".

    Kopifunksjonen skal ikkje brukast til å gjere endringar i tilgjengelegheitserklæringa til ein nettstad som allereie har utkast til tilgjengelegheitserklæring eller ei produsert tilgjengelegheitserklæring.