Konkurranse: kven er først ute med tilgjengelegheitserklæring?
Mandag 3. oktober rulla vi ut løysinga for tilgjengelegheitserklæring på uustatus.no. Samtidig køyrer vi i gang ein konkurranse om å vere først ute med å publisere ei ferdig utfylt tilgjengelegheitserklæring.
Vi har i løpet av den første veka i oktober gitt tilgang til uustatus.no til verksemder i offentleg sektor. Vi veit at fleire har logga inn i løysinga, og at mange allereie er i gang med å både teste nettstaden opp mot WCAG og å fylle ut erklæringa.
Så då lurer vi på - kven er først ute med å publisere tilgjengelegheitserklæring på sin nettstad?
Det er krav om at alle skal ha publisert erklæring til februar 2023, og vi vil gjerne premiere den som er først ute.
Slik deltek du
For å delta, må du ha gjennomført det grundige arbeidet med å teste løysinga di, fylt ut tilgjengelegheitserklæring på uustatus.no og publisert lenke til erklæringa på framsida til nettstaden den gjeld for, og helst i botnteksten. Lenketeksten skal vere "Tilgjengelegheitserklæring" (nynorsk) eller "Tilgjengelighetserklæring" (bokmål).
Premie
Du som oppfyller kriteria over og dermed har publisert erklæring først, vil vinne ein gigantisk sjokolade, som kan delast med alle dei flinke folka som har vore involvert i prosessen fram til ferdig publisert erklæring.
Vinnaren vil også få heider og ære, både på uutilsynet.no og i sosiale media. Er vi heldige, får vi kanskje ein prat med vinnaren i eit intervju på fagbloggen vår.
Kom i gang du også
Freistar dette? Kom i gang du også, så kan det vere du som stikk av med både premie og skryt!