I dag blir det lansert eit nytt verktøy for å måle kor inkluderande det digitale Noreg eigentleg er - Nasjonal indeks for digital inkludering (DI-indeksen). Indeksen skal vise kvar vi har kome langt, og kvar innsatsen må styrkast for å sikre at ingen blir ståande utanfor i det digitale samfunnet. Indeksen er eit samarbeid mellom Digdir og Nkom.
Regjeringa vil fram mot 2030 sikre at alle får ta del i digitaliseringa. Noreg har ei digitalt moden befolkning, men mange strevar med å bruke digitale tenester. Nasjonal indeks for digital inkludering (DI-indeks) skal følge utviklinga og gjere det enklare å sjå kvar vi må styrke innsatsen. Digitaliseringsdirektoratet ved Uu-tilsynet har utvikla indeksen i samarbeid med Nasjonal kommunikasjonsmyndigheit (Nkom).
Målet er at kunnskapen skal bidra til å forebygge digitalt utanforskap og legge til rette for gode tiltak for eit samfunn der alle har moglegheit til å delta.
– Digitalt utanforskap er ei stor samfunnsutfordring. Å falle utanfor digitalt er vanskeleg for den enkelte og dyrt for samfunnet. Regjeringa har som uttalt mål at alle skal kunne delta i det digitale samfunnet. Med DI-indeksen får vi for første gong eit samla bilde av digital inkludering i Noreg. Det gir oss betre grunnlag for å sette inn tiltak der behova er størst, seier digitaliseringsminister Karianne Tung.
Eit viktig verktøy for politikken og samfunnet
Indeksen skal vise utvikling over tid og viser i dag data frå basisåret 2023. Indeksen skal oppdaterast med nye data annakvart år. Tal frå 2025 blir publisert i 2026.
DI-indeksen skal vere eit nyttig verktøy for alle som jobbar med digital inkludering, og gi innsikt til interesserte innan forsking og media. Indeksen er eit resultat av eit godt samarbeid på tvers. I etableringsåret har særleg Nasjonal kommunikasjonsmyndigheit (Nkom) vore ein viktig samarbeidspart.
– Vi ser at brukarvennlegheit og universell utforming, og tillit til teknologi og myndigheiter, peikar seg ut som område som må prioriterast framover. Utan dette risikerer vi at deler av befolkninga vert haldne utanfor, og då mister digitaliseringa sitt viktigaste formål – å gjere kvardagen enklare for alle, seier tilsynsdirektør Malin Rygg i Uu-tilsynet i Digitaliseringsdirektoratet.
Dette måler indeksen
I DI-indeksen ser vi på kva utfordringar innbyggarane møter på ulike område som kvar for seg og til saman har avgjerande innverknad på digital inkludering:
- Tilgang til internett, ikt-utstyr og eID
- Bruk av digitale tenester
- Brukarvennlegheit og universell utforming
- Digital kompetanse og dømmekraft
- Tillit til teknologi og myndigheiter
Områda inneheld indikatorar som får kvar sin score som måler alt frå teknisk tilgang og brukarvennlegheit til dømmekraft, erfaringar og haldningar. Desse er bygd på faste, årlege datasett frå offentlege undersøkingar gjennomført av SSB, DFØ, HK-dir, Rambøll, Digdir, Uu-tilsynet og Nkom.
Slik skal indeksen brukast framover
Sjølv om DI-indeksen gir verdifull informasjon om situasjonen her og no, er det først og fremst eit verktøy for å måle utviklinga over tid. Dermed kan vi følge med på effekten av tiltaka.
– Det er veldig positivt at vi no har ein nasjonal indeks for digital inkludering. Den gir oss eit felles utgangspunkt og kan brukast av både myndigheiter, kommunar og tenesteleverandørar til å sjå kvar utfordringane ligg og kvar ein må legge inn meir innsats, seier John-Eivind Velure, direktør i Nkom.
Les og sjå nærmare på indeksen på uutilsynet.no.
Pressespørsmål
For meir informasjon eller intervju, ta gjerne kontakt:
- Kommunikasjonsansvarleg i Tilsynet for universell utforming av ikt, Torhild Brudvik, tlf. 482 88 309, e-post: torhild.brudvik@digdir.no
- Tilsynsdirektør Malin Rygg, tlf. 971 97 317, e-post: malin.rygg@digdir.no