Uu-tilsynet avsluttar fleire tilsyn i helsesektoren etter at verksemdene har retta på krav til universell utforming i tide. Dette gjeld Norsk Helsenett, Norsk Helseinformatikk, Nasjonalt klageorgan for helsetenesta, Aleris og Volvat.
Tilsyn som er gjennomført i haust avdekte brot hos fleire verksemder, mellom anna på nettstaden Helsenorge.no, som blir forvalta av Norsk Helsenett SF. På helsenorge.no vart det funne brot på åtte av 14 testa krav. Feila gjaldt mellom anna struktur og presentasjon av innhald, dokument, alternativ tekst til bilete, kontrast, statusmeldingar og skjema. Norsk Helsenett SF fekk pålegg om retting hausten 2025. Då fristen var ute, var feila som skulle korrigerast retta i tråd med krava, og tilsynet vart avslutta.
– Helsenorge.no kjem samla sett godt ut i testen og har jobba godt gjennom prosessen, seier tilsynsdirektør Malin Rygg.
Retta minstekrav til universell utforming
Tilsynet kontrollerer etterleving av minimumskrav til universell utforming av ikt. Det har også blitt gjennomført tilsyn med Norsk Helseinformatikk AS (nhi.no), Aleris (aleris.no og appen Mitt Aleris), Akershus universitetssjukehus (appen MyDignio), Volvat (volvat.no) og Nasjonalt klageorgan for helsetenesta (helseklage.no) i 2025. Alle desse er no avslutta etter at verksemdene har jobba godt med retting i løysingane.
På nhi.no avdekte tilsynet ni brot av elleve krav som var testa, og verksemda gjorde ein stor jobb med korrigering. Tilsynet er avslutta. Aleris vart testa på både nettstad og app. Tilsynet avdekte ni brot av elleve krav som var testa på aleris.no, og fem brot av åtte krav som vart testa på appen Mitt Aleris. Etter pålegg om retting vart feila retta innan fristen, og tilsynet vart avslutta. Appen MyDignio hadde ni brot av ti krav som var testa. Etter pålegg om retting vart feila retta innan fristen, og tilsynet vart avslutta. Volvat.no og helseklage.no hadde høvesvis brot på ni av elleve testa krav og åtte av 13 testa krav. Etter pålegg om retting, kom begge verksemdene i mål innan fristen.
Alle tilsynsrapportar er publiserte på uutilsynet.no.
– Formålet er digitale løysingar som fungerer for alle. Mange møter helsevesenet i ein sårbar livssituasjon der det er viktig å kunne ha dialog med helsevesenet utan hjelp. Då er det viktig at løysinga fungerer for deg. Derfor er det særleg viktig å ta omsyn til ulike føresetnader, for eksempel eldre og personar med norsk som andrespråk, og brukarar med nedsett funksjonsevne, seier Rygg.
Regelverk om universell utforming av ikt
Regelverket er forskrift om universell utforming av ikt, som har heimel i Likestillings og diskrimineringslova. Webdirektivet er innlemma etter 2021 og har gitt eit delt regelverk for offentleg og privat sektor. Tilgjengelegheitserklæring er eit krav for offentlege verksemder.